DIPLOMATIK GATNAŞYKLARYŇ 30 ÝYLLYGY MYNASYBETLI DABARALY AGŞAM

2022-nji ýylyň 20-nji aprelinde Türkmenistanyň Ýaponiýadaky Ilçihanasynda Türkmen-Ýapon diplomatik gatnaşyklarynyň ýola goýulmagynyň 30 ýyllygy mynasybetli dabaraly agşam geçirildi.

Dabara Ýaponiýanyň Daşary işler ministriniň orunbasary (Parlament işleri boýunça) Hondo Taronyň ýolbaşçylygynda bu ministrligiň degişli wekilleri, deputatlar, Ýaponiýanyň köpçülikleýin habar beriş serişdeleriniň wekilleri gatnaşdylar.

Dabarada Ilçi G.Elýasow, Ýaponiýanyň Daşary işler ministriniň orunbasary T.Honda, Tokyo MX teleýaýlymynyň Daşary gatnaşyklar boýunça telegepleşikler bölüminň ýolbaşçysy, tanymal žurnalist R.Oşiba we başga-da birnäçe wekiller çykyş etdiler. Çykyş edenler Türkmenistanyň Garaşsyzlygynyň gazananlary, Bitaraplyk syýasatynyň ähmiýetini, daşary ykdysady gatnaşyklary ösdürmekde eýeleýän orny, Türkmen-Ýapon gatnaşyklarynda 30 ýylyň dowamynda gazanylan ösüşler, ikitaraplaýyn ykdysady gatnaşyklarymyzyň aýratynlyklary we gelejekde täze ugurlary alyp gitmegiň mümkinçilikleri, medeni-gumanitar ugurlardaky alnyp barylýan netijeli işler barada dabara gatnaşyjylara gürrüň berdiler.

Dabaranyň çäklerinde türkmen milli däp-dessuryny, medeniýetini tanyşdyrýan sergi guraldy. Şeýle hem, myhmanlara türkmen milli tagamlarynyň dürli görnüşleri, olaryň taýýarlanylyşy, türkmen saçagynyň aýratynlygy we onuň ähmiýeti tanyşdyryldy.