Türkmenistan bilen Ýaponiýanyň syýahatçylyk hyzmatdaşlygynyň meseleleri ara alnyp maslahatlaşyldy

2023-nji ýylyň 24-nji noýabrynda Türkmenistanyň Ýaponiýadaky Ilçisi Atadurdy Baýramow Ýaponiýanyň Syýahatçylyk agentlikleriniň assosiasiýasynyň (JATA) prezidenti Kunihiko Ebina bilen duşuşdy.

Duşuşygyň dowamynda taraplar türkmen-ýapon hyzmatdaşlygynyň syýahatçylyk ugry boýunça pikir alyşdylar.

Ilçi A.Baýramow Türkmenistanyň syýahatçylyk ulgamyny kämilleşdirmekde halkara tejribäniň we gazanylanlaryň ulanylmagyna aýratyn ähmiýet berilýändigini hem-de Türkmenistan bilen Ýaponiýanyň arasynda syýahatçylyk babatda ýola goýlan hyzmatdaşlygyň netijeli häsiýetini aýratyn belledi.

Türkmenistana syýahat etmäge barýan Ýaponiýanyň syýahatçylarynyň sanynyň ýylsaýyn artmagy muňa mysal bolup durýar.

Ýaponiýanyň Syýahatçylyk agentlikleriniň assosiasiýasynyň guramagynda Türkmenistanyň we Ýaponiýanyň syýahatçylyk kompaniýalarynyň arasynda alyş-çalyş okuw maksatnamalarynyň geçirilmeginiň ähmiýeti nygtaldy.